Австрали улс руу "МИАТ" ТӨХК-ийн онгоцоор тусгай үүргийн нислэгийг урьд шөнө (06.06) хийсэн. Энэ нь манай улс анх удаа Австрали улс руу иргэний агаарын тээврийн шууд нислэг хийж буй тохиолдол болж байгаа аж. Оюутолгой компани Австрали Улс руу ажилчдаа хүргэхээр “МИАТ” ТӨХК-ийн онгоцыг түрээслэн нислэг үйлдсэн юм.

Австрали улсаас Монгол Улсад суух Элчин сайд Дэйв Воусэн энэхүү нислэгийн түүхэн үйл явдалд буюу Австрали улс руу тусгай үүргийн онгоц нисгэх ажилд гар бие оролцсондоо баяртай байгаа талаараа хэлжээ. 

Тэрээр “Монгол Улсаас Австрали руу ниссэн анхны МИАТ-ын шууд нислэгийг үйлдэхэд гар бие оролцсондоо баяртай байна. Австрали, Монголын харилцаанд түүхэн үйл явдал болж байна. Манай хоёр орны оюутан сурагчид, хөрөнгө оруулагчид болон бизнес эрхлэгчдийг шууд холбох ирээдүйн шинэ боломжийн эхлэл нь гэдэгт итгэлтэй байна. Та бүхний аяны алтан шар зам тань өлзийтэй байх болтугай” хэмээжээ.

Австрали руу ниссэн манай тусгай үүргийн онгоцоор 250 иргэнээ /06.08/ ирэх даваа гарагийн өглөө Сиднейгээс авч ирэх юм.